Lidah Tinta

Ikon

Saatnya tinta bersuara lebih lantang dari suara senjata

Tapeuköng Adat ngon Polisi Masyarakat

Hikayat Herman RN

Assalamualaikum warahmatullah

Poma ngon ayah bandum seureuta

Assalamualaikum warahmatuhu

Ayah ngon ibu keuluarga lingka

Dengon Bismillah tapujoe Allah

Kalimah taibah ngon peupon haba

Seulaweuet saleuem ke Rasulullah

Do’a aslamah keu waréh ambiya

Haba lon pupôn lon lakèe meu’ah

Meunan amanah bak ureueng tuha

Kadang euntreuk na haba lon salah

Maklomlah lidah tuleueng jih hana

Izin lon lakèe poma lon seumah

Teuma ngon ayah lon rika haba

Saboh calitra lon rawi Polmah

Beujeut amanah keu ureueng dumna

Istilah Polisi masyarakat lon ujoe peujeulah

Saboh komunitah di Indonesia

Tujuan mulia seusuai sunnah

Katroh jilangkah sinoe Kuta Raja

Polisi komuniti pôn jikeuen istilah

Na syit nyang peugah masyarakat polisi

Keuamanan geucipta nyankeu tugah

Seusuai surah Skep Kapolri

Pemolisian Masyarakat lom keun istilah

Na syit nyang tamah Pemolisian Berorientasi Masyarakat

Bek that meukarat ngon le istilah

Geuseubôt Polmas ‘ohleuh jipeusingkat

Polmas geubeuntôk keu masyarakat

Keu peuköng adat deungon budaya

Demi keuamanan ngon jaga rakyat

Polisi seupakat jitrôn u desa

Polisi jiduek bak rata jurông

Mulai gampông sampoe u kuta

Masyarakat teulibat lansông

Bak peukong gampông adat budaya

Bahlé polisi nyang po tungkat

Teutap rakyat nyang mat punca

Meunyo na masalah peuduek mufakat

Di sinan sapat musyawarah desa

Saweueb that paléh ureueng hana mufakat

‘Oh ka meukarat geupeudong dawa

Ladum hue cöt ladum hue lhôk

Biasa si bungkôk nyang mat punca

Teuma meunyo buet ka geupeuduek pakat

Peusapat rakyat ngon ureueng tuha-tuha

Udép lam gampông hana lé meukarat

Tanyoe pih seumangat mita beulanja

Nyankeuh saboh tujuan Polmas

Ngat bèk ceumah ureueng lam desa

Agam ngon dara seutot seulamat

Saweueb Polisi ngon masyarakat ka geupeuseutara

‘Oh takeunang jameuen cukôp that sakét

Rakyat geuceupét objek polisi

Na nyang gesipak keudéh lam parék

Meu ubé pijét rakyat hana areuti

Teuma jinoe hana peu gundah

Poma ngon ayah adun ngon adoe

Deungon na Polmas kaleuh geusurah

Pak Geuchik ngon Imum Meunasah sajan aman nanggroe

Tuha Peuet ngon Tuha Lapan

Digob nyan rakan seureuta mukim

Perangkat desa nyan hana keutinggalan

Meujabat tangan deungon nyang lain

Bandum nyan geusurah lam undang-undang

Leumbaga adat sajan tamong lam Polmas

Panglima Uteuen seureta Keujruen Blang

Ngon bandum pawang hana geubatas

Pawang Glé ngon Pawang Laôt

Teutap turôt peurangkat desa

Tamah keulai Peutua Sineubôk

Kuta deungon Lhôk na Syahbanda

Bandum awak nyan nakeuh leumbaga adat

Di sinan teumpat pulang masalah

Deungon Polmas geubôh saboh teumpat

Geulindông rakyat kaya ngon papa

Ngon Tuha Peuet DPR gampông

Tuha lapan nyang peuingat gata

Di sinan ka na wali ngon karông

Peudong hukôm jeulah peukara

Sukèe lhèe reutôh ban aneuk drang,

Sukèe jisandang jeurah haleuba,

Sukèe tok batèe na bacuet-bacuet,

Sukèe Imuem Peut nyang gok-gok donya

Nyan keu saboh untông di tanyoe

Lawét nanggroe geutèkèn MoU

Polisi ngon rakyat kajeut meusahoe

Sajan mat jaroe saboh meja lom saboh bangku

Meunyo awai takalon kisah

Polisi geutinta mirah le masyarakat

Teuma jinoe kajeut tapeusudah

Deungon Polmas tapeukong adat

Tabila rakyat gasien ngon kaya

Keu ureueng papa tabi teumpat

Tapeudong nanggroe gampông ngon kuta

Na masalah taduek mufakat

Haba indatu beuna taingat

Nyan wasiat seupanyang masa

Peuseuleusoe masalah geuyue mufakat

Haba peusapat beukai na suwa

Hana seuleusoe bak jambô desa

Pakat peumuda lapor polisi

Meunankeuh Polmas atô peukara

Jeu tanyoeng Kapolda atau Kapolri

Hana peu lé takôt pancuri tamong lam gampông

Rata jurông ka na nyang jaga

Pancuri manok ka na soe peutamong lam karông

Hana lansông sak lam peunjara

Teuma saboh nyang sosah dimita

Pancuri lam rimba nyang koh kayèe

Meunyo pancuri teubèe bulèe bak dada

Pancuri pèng neugara bit hantom na malèe

Meunankeuh tamsé lonkheun umpama

Beukong budaya tanyoe keulai

Taharap syit u bak KPA

Beukerja sama deungon polisi

Leumbaga adat bèk tapeutuwoe

Leumbaga nanggroe awai kon ka na

Meunyo bak pèng jeut lakèe bak IOM

Beujeut gata som ke kas dèsa

Teuma awai phôn kaleuh geupeuingat

Nyoe peudong rapat teutua desa

Dalam Polmas bèk na nyang jungkat

Beungèh Polda NAD hana pah peukara

Reudôk di Aceh jiteuka ujeun

Reudôk lam uteuen jiteuka geumpa

Beugöt-göt tapeuliara bayeun

Meunyo kureung umpeun jiwoe lam rimba

Meunankeu haba ulôn peusingkat

Beujeut keu nasihat adun ngon adoe

Padum na keuh ék ureueng peuingat

Nyang leubèh teupat taingat kedroe

Lon lakèe meu’ah kureung ngon leubèh

Meunyo kureueng sahèh tanyong Kapolda

Tanyong bak IOM jeut syit hai rakan

Ka meugumpoi sinian Uni Eropa

Ide Polmas nyoe dari awak nyan

Bôh kemitraan polisi masyarakat

Cukôp mulia tujuan di sinan

Ngat jeut meujalan leumbaga adat

Jinoe haba ulôn peusudah

Poma ngon ayah meu’ah beusaré

Bak Kapolda syit lon lakèe meu’ah

Kadang na salah bak lon meucaé

Teuma bak IOM teurimong gaséh

Haba lon peuabéh ‘oh no kada

Meunyo na keunong meucukèh bak até

Meu’ah waréh ubiet ngon raya

Wassalamualaikum nyak ngon abi

Takzim ulôn bri keu dua nangmbah

Seulamat geutanyoe watèe bak titi

Ngon syaf’ah nabi seulamat bak Allah…

Wassalamualaimu warahmatullahiwabaraktuh

Iklan

Filed under: Essay

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

TABIK

Pembaca yang budiman, tidak dilarang mengutip tulisan dari web blog ini, baik seluruh maupun sebagian. Harapan kami, jangan lupakan sumbernya. Senang kami jika ada komentar ditinggalkan, apa pun bentuknya. Diskusi lebih lanjut dilayani di pelangijantan@gmail.com Terima kasih.

PO TULEH

Masukkan alamat surel Anda untuk berlangganan blog ini dan menerima pemberitahuan tulisan-tulisan baru melalui surel.

Bergabunglah dengan 2.400 pengikut lainnya

%d blogger menyukai ini: